河背牛徑

2020-12-14

景觀：
體力：
難度：
路線︰	大帽山巴士站➡河背➡牛徑➡牛徑村➡錦上路
全長：	9公里	需時：	1小時


	攀升：131米	下降：680米
	最高：508米	最低：1米

路況：

山徑40%

樓梯20%

單車徑20%

馬路10%

石板路10%

坡度：

攀升 131 (10%)

下降 680米 (90%)

曝曬：

60%

A A A

牛徑村（英語：Ngau Keng Tsuen）位於新界元朗區八鄉的一個鄉村地區，屬原居民村落，居民主要為李氏與鄭氏之圍頭人。具有悠久的歷史，早於香港開埠以前已有原居民在此居住。

「合山圍牛徑村五年一屆太平清醮」（最近一屆在2017年舉行）每五年舉辨一次均為三日四夜，村民傾力籌備，僑居海外的村民亦會回鄉參與，打醮期間均需進行齋戒，祈求百業茂盛，降福迎祥，風調雨順，國泰民安。

河背牛徑 1

上午玩完春花落、三支香，食緊飯時大家講起，都覺得好似冇乜點踩過車，諗下下半場去邊好。最後決定不如call van 上大山玩返轉純踩路線爽下，見最近好多車友都玩牛徑，好似好正好好玩咁，就試下。之前都成日上網睇片見師兄踩牛徑GEE路，其中有D路段都幾斜，今次可以試試。

河背牛徑 8

搭VAN上到大山巴士站，著好PAD就出發。先向河背體驗徑入口進發，一如以往要上試練之石，依家大機過到啦。去到分岔口齊人就繼續落河背，同朝早路線係兩種唔同體驗，上午係郊遊睇景點。依家就順落山，有速度感，真係好玩!! 一路落到英國仔，英國仔由來我都仲未知點解!!??上網搵過都搵唔到，真係要有返一定山車年齡先可能知道~ 不過依個分岔口就去不同地方，右邊方向就係甲龍林徑，右前方就係上轆牛嶺，而左邊就可以上返直升機坪，直行就繼續河背越野單車徑。

河背牛徑 14

今次要去牛徑，牛徑入口就係河背越野單車徑，過左英國仔前少少右手邊，平時因為車速快可能會留意唔到。今次過左英國仔，大家都慢慢落望住右手邊，最後留意入口啦。牛徑平均都斜度都唔少，比起元朗仔、河背斜，但比蜘蛛略緩，整體都好好玩，但新手就唔建議。開始左唔係好耐就有個考牌位左手髮夾彎，冇膽量去試，但其實有帶PAD同頭盔都好安全，跌都係泥路黎。Calvin好野夠Guts試左，不過差DD，都係未成功。見到大雄佢地D片入邊個個都輕鬆過到，果然個個都高手，但原來實際見到係斜好多...哈哈~~

河背牛徑 20

下次再玩會試下，我諗要煲下先有少少機會成功!!繼續踩中途都路況都係泥路加D碎石為主，牛徑仲有一大特色就係條路夠原始，比起官方路線窄，同兩旁都滿怖植物。如果落雨後就唔太建議去玩啦，因為睇條路濕度都幾高，好難乾得返。牛徑大部份路段都係落，有少量上斜位，我都係推車上去多，上網睇片好多師兄都踩到上去，但當然要量力而為。踩左大約十分鐘左右，接近牛徑中段，會見到左手邊有條落斜路，路左手邊有繩，所以都證明依段路有D斜。大家都有踩落去呀，仲有拍片，但條路真係幾斜下，仲幾粉。華哥係我前邊，踩到沙塵滾滾，我食住塵咁慢慢落，落依D斜以前唔識，依家知道主要係用頭brake，身體就要向後，PATPAT就貼近尾軚，咁會比較安全。尾brake 就用2成左右，因為用得多會冼軚，依個係慢落方法。快落就唔識未夠班去試。落緊果陣都幾緊張，中途有2-3個樹根位，快加速，好少踩D咁斜路所以未適應。落完條斜就係電塔，電塔後路冇之前咁斜，要上一小段。之後繼續，今次路右手邊有繩，都係慢慢落。落完要推一段仔路上斜，之後繼續都係泥路好快就去到引水道出口。